Jóla jóla jóla...

Þetta er yndislegur tími. Við erum búin að vera dugleg að breyta og bæta hér í kofanum og þetta er alltaf að taka á sig betri mynd. Flestar gjafir komnar í höfn, jólakortin send, búið að baka og éta tvær sortir og ég veit ekki hvað og hvað. Það er ótrúlega ljúft að hafa tímann svona fyrir sér þó úthaldið sé nú ekki alveg eins og það á að vera. Ég verð stundum að hætta í miðju kafi og leggjast en ég held áfram og ætla í vinnuna strax eftir áramótin takk fyrir. Get ekki beðið. Ég get svarið það þetta er örugglega í fyrsta skipti sem ég hlakka til að fara í vinnu. Svo er rúsínan í pylsuendanum að upplifa jólin í gegnum Helga Magnús. Þetta eru fyrstu jólin hans svona með einhverju viti. Núna eru til dæmis allir með húfu jólasveinar og gamlir menn með skegg líka....hahaha. Ég hlakka alveg svakalega til aðfangadags, þá verð ég líka 34 ára kerlingartetur. (Shit)

Hvar fæ ég buxur á 12 ára strák sem kosta ekki milljón en eru samt ekki algjört drasl?

Æ, nú vantar alveg helming jólastemmningarinnar eftir að snjórinn leystist upp. Þá er ekkert annað að gera en að jólast almennilega. Hvernig væri nú til dæmis að taka fram jólaskraut og skrifa jólakort, kannski að það hjálpi?

Þetta eru voðalega skrítnir dagar. Ég má ekkert reyna á mig en á samt voðalega erfitt með að gera ekki neitt. Ég reyni að gera eitthvað til að tapa ekki geðheilsunni. Er búin að lesa nýja Arnald til dæmis. Kláraði hana reyndar á tveimur dögum á spítalanum. Voðalega fannst mér lítið varið í hana, ég var búin að fatta plottið í miðri bókinni. Núna er ég að lesa Dan Brown sem mér finnst mun betri og svei mér þá barasta spennandi og skítsæmileg. Svo er ég með krossgátublað í gangi líka og er meira að segja loksins byrjuð að skrifa söguna sem ég er búin að vera á leiðinni a skrifa í mörg ár. Stundum er ég samt frekar einmana og lítil í mér. Æ, ég nenni samt ekki að vera að vorkenna mér. Ég hef það nú bara mjög gott þegar allt kemur til alls. Það koma bara móment svona af og til.

Hmm...þarf að fara að setja inn myndir af hvolpinum Mola og Helga Magnúsi með nýja drengjakollinn sinn. Bara að ég fyndi fjandans snúruna...

"Staða Íslands miðað við aðrar þjóðir hefur versnað í öllum námsgreinum sem svonefnd PISA-könnun nær til, mest í lesskilningi en minnst í stærðfræði. Niðurstöður könnunarinnar voru kynntar á fundi í menntamálaráðuneytinu í morgun."

Sjá: http://mbl.is/mm/frettir/frett.html?nid=1306954

Hvernig stendur eiginlega á þessu? Hvernig getur árangur íslenskra nemenda verið verri en danskra? Mér finnst þetta mjög undarlegt. Í öll þau ár sem Benni minn var í grunnskóla í Danmörku þurfti hann aldrei að læra heima, aldrei að taka próf og satt að segja höfum við gert grín að því hvað skólinn sem hann var í var lélegur og metnaðarlaus. Svo þegar hann kemur heim í Breiðagerðisskóla er hann að drukkna í heimalærdómi og prófum og nú hugsar maður "jæja nú er barnið loksins farið að læra eitthvað"! Er það rétt? Hvernig fara eiginlega þessar PISA kannanir fram? Getur verið að skólinn hér sé bara svona miklu erfiðari og þess vegna komi þetta svona út. Eru sömu spurningar lagðar fyrir öll lönd eða er hvert land að meta sjálft sig? Ég held að allir sem hafa búið í Danmörku geti tekið undir það með mér að skóli þar er almennt léttari en á Íslandi. Getur verið að þeir komi betur út en við því skólinn er léttari hjá þeim? Nú ef öll löndin eru metin út frá sömu forsendum, vonandi, þá er eitthvað mikið að hér. Þá er greinilegt að það ber ekki árangur að leggja svona mikið á nemendur, það hefur öfug áhrif. Mér finnst ekki eðlilegt að barn í 6 ára bekk (Benni) sé látið skrifa sögu heima þegar hann er enn að læra að lesa og skrifa. Það verður að passa að börn fái hæfilega erfið verkefni, þau verða bara óörugg og fyllast minnimáttarkennd ef verkefnin eru of erfið.

Svo skil ég ekki alveg hvernig á að hækka menntunarstig kennara þegar ekki er hægt að manna skólana af menntuðum kennurum eins og staðan er í dag. Það er fínt að hafa metnað fyrir þessu og ekkert að þessari hugsjón en hvernig á að framkvæma þetta? Þetta er alveg eins og að byggja fullt af leikskólum og elliheimilum en svo fæst ekki fólkið til að vinna störfin. Þetta lítur allt saman voðalega vel út á pappírum og vinsældir þeirra stjórnmálamanna sem þessar ákvarðanir taka aukast fyrir bragðið, -er það kannski tilgangurinn? Mér finnst alveg óþolandi þessi íslenska skammtímahugsun. Hvenær ætlum við að læra að hugsa málin til enda? Jú, menntamálaráðherra segir að það verði að hækka laun kennara, gott og blessað og alveg rétt hjá henni. Málið er bara að hún hefur ekki vald til þess. Ég vona að þessi breyting hafi áhrif til hins betra, bæði fyrir árangur nemenda og laun kennara en er því miður vantrúuð á að þetta sé leiðin. Laun kennara hafa ekki verið mannsæmandi í áratugi og það þarf held ég eitthvað nálægt kraftaverki sem hægt er að kalla hugarfarsbreytingu hjá þeim sem ráða til að laun þeirra verði leiðrétt.

Það er bara því miður svartur, ljótur blettur á þessari annars yndislegu þjóð sem kallast græðgi og skammsýni sem stjórnar allt of mörgu og smitar út frá sér og verður þess valdandi að þeir sem minna mega sín, börn, öryrkjar, sjúklingar og gamalmenni verða afgangs þegnar því þetta fólk er ekki að græða heldur þarf að græða það.

En hvað er hægt að gera? Hvernig er hægt að snúa þessari þróun við? Ég held að allir séu sammála um að eitthvað þurfi að gera, a.m.k. eru allir sem ég þekki á sömu skoðun og ég. Ég trúi því líka að fólk sé almennt góðhjartað og vilji að okkur í þessu landi líði vel og höfum sómasamleg kjör og lifum mannsæmandi lífi. Fátækt á ekki að vera til, fólk á ekki að þurfa að vera á götunni og ekki eiga fyrir mat, það er meira að segja í lögum landsins! Við vitum að til er nógu andskoti mikið af peningum, þeim er bara svo herfilega misskipt. Ég er til dæmis með 5 sinnum lægri laun en æðsti yfirmaður minn. Margir eru með svo há laun að þeir vita ekki hvað þeir eiga að gera við peningana á meðan aðrir vita ekki hvernig þeir eiga að hafa efni á næstu máltíð. Það er ekki hægt að loka augunum fyrir þessu. Mér finnst þetta skammarlegt og mér finnst að stjórnmálamenn ættu að skammast sín mest, því valdið liggur hjá þeim til að breyta þessu. Hvernig getur það verið réttlátt þegar það var einhver svakalegur afgangur af ríkissjóði en sjúkrahúsin svelta, leikskólar geta varla starfað og fleiri grunnstoðir samfélagsins geta varla starfað vegna peningaskorts. There is something rotten in the state of Iceland!

Kannski er bara málið að hætta að treysta á stjórnvöld til að gera eitthvað og gera eitthvað sjálfur? Er lýðræðið að virka? Maður er alltaf rífandi kjaft út í horni yfir hinu og þessu en það skilar auðvitað engu. Æ ég veit það ekki, maður kýs þetta fólk og svo finnst manni það ekki gera nóg. Ekki það, það vinnur örugglega mikið og allt of mikið, eins og sönnum Íslendingi sæmir en hverju skilar það? Það er kannski lærdómur til að draga af þessu öllu saman: Afköstin eru ekki meiri þó álagið sé meira. Hvað ætli gerist ef það yrði fært í lög að bannað væri að vinna meira en 8 tíma á dag, 5 daga vikunnar?

Það er kominn tími á punktablogg:

• Ég skil ekkert í þessu Facebook en er með af því allir eru með.
• Ægilega er þetta sorglegt með drenginn sem keyrt var á í Keflavík. Hver ætli sé sagan á bak við bílstjórann?
• Ég komst að því í dag að Hagkaups verslunarferð er of mikið fyrir mig, heilsufarslega og fjárhagslega séð.
• Jess, nú ætla ég að finna jólaskrautið og setja það upp smátt og smátt.
• Heyrði fyrsta jólalagið í dag....Ég kemst í hátíðarskap...
• Er ekki einhver vírus í tölvunni manns ef það koma stundum endalauuuuuuuuuuuuuuuuuuusir stafiiiiiiiiiiiiiiiiiir af sjálfu sér og tölvan er voðalega lengi að starta sér?
• Lífið er yndislegt, ég geri (næstum) það sem ég vil.
• Við fengum okkur hvolp í vikunni. Hann heitir Moli og er fæddur 18. september 2007. Hann er blandaður Labrador, íslenskur og Border Collie, en mest Labrador. Mórauður í hvítum sokkum. Hann er hrikalegt krútt og fyrirferðarmikill ungi sem pissar og kúkar út um allt (en þó alltaf á gólfið). Við hlökkum mikið til að fara með hann á hlýðninámskeið.
• Það eru víst engar fréttir en hrikalega eru þessi Laugardagslög leiðinleg ojjjjjjjjjjj. Það er ekki nema einhver grínlög sem er hlustandi á. Mér finnst þetta ansi dýrt spaug.
• Ég tel mig vera femínista en mér finnst kynsystur mínar eiga það til að ganga of langt þegar þeirra markmið virðist vera að gera konuna að æðra kyni frekar en jöfnu karlkyninu.
• Ég veit að það blundar í mér listamaður, eins fyndið og það kannski hljómar, ég er bara að bíða eftir að hann komi út úr skápnum.
• Mig langar í Gasolin plötur og Kim Larsen plötur, de er superfede man!
• Ég fékk aðeins of miklar upplýsingar hjá lækninum sem skar mig: Görnunum er ýtt upp til að komast betur að svæðinu. Og eggjaleiðarinn var orðinn svo teygður og langur að það varð að taka hann líka. Bjakk, þetta er bara ekki huggulegt en varð samt að deila því með ykkur múhahahah!
• Man ekki meira í bili, verið þið sæl!

Þá er það staðfest. Góðkynja var það. Ég var bjartsýn allan tímann og mér fannst bara ekki passa annað en þetta væri góðkynja en það er samt auðvitað léttir að fá það staðfest. Þá er þessi pakki búinn og ég held áfram að safna í mig kröftum til að halda áfram lífinu með bros á vör og gleði í hjarta. Það er svo mikið eftir að gera og upplifa og ég hlakka svo óstjórnlega til að takast á við allt sem framundan er.

Iss nú er sko nóg komið af sjúkratali, fuss og svei! Best að snúa sér að öðru. Eru ekki jólin að koma og svona? Hmmm, skammdegi og ljós í skammdeginu. Ég held ég hafi bara aldrei á ævinni haft jafn mikinn tíma til að undirbúa jólin. Er að hugsa um að fara að skoða uppskriftir fyrir jólamatinn; forrétt, aðalrétt og eftirrétt. Drykk, smákökur, konfekt og aðrar kökur. Svo væri ég til í að föndra eitthvað. Er það ekki upplagt fyrir svona heimalinga eins og mig? Ég verð að hafa hugann við eitthvað, annars bilast ég. Kannski að það sé hægt að finna eitthvað sniðugt dúllerí á netinu...hó hó hó

Jæja, kerlingin bara mætt á svæðið. Komin heim í faðm fjölskyldunnar í litla yndislega kofann á Sogaveginum. Fékk sem sagt að fara heim í gær og bara við ágætis heilsu. Aðgerðin heppnaðist víst vel; ekkert grunsamlegt sást og þeir náðu æxlinu í heilu lagi, sem var víst frekar mikið atriði. Verra hefði verið ef það hefði sprungið og sýkt kviðarholið. Ég mæti svo í heftatöku á föstudaginn og þá fæ ég líka svar úr ræktuninni. Þetta fór bara eins og best verður á kosið.

Ég hef það bara ágætt, hélt satt að segja að ég yrði miklu meira kvalin og á rosalegum verkjalyfjum. Ég finn auðvitað fyrir þessu, bæði innvortis og svo fyrir skurðinum en get ekki sagt að ég kveljist beint. Svo tek ég bara panodil og vostar -ótrúlegt alveg! Ég verð samt að passa mig að ætla mér ekki um of, ég er fljót að þreytast ef ég er of lengi á fótum og svo má ég ekki lyfta neinu, beygja mig niður eða teygja mig upp.

Maður er náttúrulega í góðu yfirlæti á Hótel Smára og ekki hægt að kvarta. Á sömu stofu á spítalanum lá kona sem var mikið veik og að ég held með krabbamein. Ég prísa mig sæla að hafa bara þurft að fara í þessa litlu aðgerð miðað við hvað hún er að ganga í gegnum aumingja konan.

Nú verð ég bara að halda andanum uppi og reyna að fá ekki "the blues" sem er víst algengt hjá konum í mínum sporum. Hringingar og heimsóknir eru sko vel þegnar. Ef ég sef þá bara svara ég ekki. Ég á eftir að vera ein alla daga á meðan strákarnir eru í sínum stofnunum, þannig að það er bara gott mál að fá símtal eða heimsóknir.

Jæja, þá er það stóri dagurinn á morgun. Regína leggst undir hnífinn....*hrollur*

Ég fékk þær góðu fréttir í dag að ekkert meira hefði sést við sneiðmyndatökuna og þetta fyrirbæri mældist 15 x 15 sentimetrar. Þokkalegasta stærð bara!

Ég get ekki lýst því hvað fólk í kringum mig er búið að vera hjálpsamt og yndislegt og ég veit að mér verða sendir svo margir góðir straumar á morgun að þetta getur ekki farið öðruvísi en vel.

Fékk lánaðar bækur og laptop í vinnunni og fékk svakalega góðan stuðning frá frábærum vinnufélögum og ekki síst yfirmanni mínum. Mikið er maður nú ríkur að þekkja svona mikið af góðu fólki...ég verð bara orðlaus.

Þetta gæti verið svo miklu miklu verra. Þetta er svolítið eins og að fara í keisaraskurð, nema ég slepp við hríðarnar og það er ekkert barn hehe. Ég vona að ég sleppi með bikiní skurð en læknirinn var ekki alveg viss svo það getur verið að ég verði skorin lóðrétt líka. Anyways...bara fá þetta burt er númer eitt. Hvenær er maður svosem á bikiní?

Ég verð á spítalanum í 2 til 4 daga og mæti örugglega á netið um leið og ég get...maður er náttúrulega háður ;)

Þangað til -hafið það gott og verið góð hvort við annað...

Þá er ferlið komið í gang. Raunveruleika- og óraunveruleikatilfinningar skiptast á og hausinn verður bara hálf skrítinn og þreyttur við að meðtaka þetta allt saman. Í stuttu máli var ég skoðuð hátt og lágt og frædd um aðgerðina og spurð sömu spurninganna af þessum og hinum starfsmanni spítalans. Þetta tók u.þ.b. fjóra tíma af deginum og svo kom ég bara heim og lagði mig. Ég hélt, eins og undanfarið, þegar ég vaknaði að þetta hefði allt saman bara verið draumur.

Það á að fjarlægja annan eggjastokkinn, það er á hreinu. Ef í ljós kemur eitthvað meira í aðgerðinni, gæti meira verið fjarlægt en það er víst frekar ólíklegt. Það bendir allt, enn sem komið er, til þess að þetta sé góðkynja æxli, sem kallast tvíburabróðir, jafnvel tvö kíló að þyngd. Ég fékk þá útskýringu að þetta væru ruglaðar frumur í eggjastokknum sem bara settu allt í gang eins og þær ættu að búa til barn. Svo bara stækkar þetta og stækkar og því stærra sem þetta er, því meiri líkur eru á því að þetta sé góðkynja, því illkynja verður víst ekki stórt, eða á a.m.k. erfiðara með það. Svo eru fleiri punktar sem benda til að þetta sé góðkynja; þetta er hreyfanlegt, ég er ung og ég hef ekki verið veik. Ég fer svo í tölvusneiðmyndatöku á morgun þar sem hægt verður að rannsaka þetta betur.

Það er ekki laust við að ég kvíði fyrir þessu en hlakka líka til að losna við þetta. Þetta er bara viðameiri aðgerð en ég gerði mér grein fyrir. Svipað og keisaraskurður, skorið á sama stað og svipað langur tími fer í að jafna sig. Það var ekki alveg á prógramminu hjá mér. Góðu fréttirnar eru þær að þó að eggjastokkurinn verði tekinn, hefur það engin áhrif á frjósemi né hormónastarfsemi. Fjúkk, því við erum ekki alveg til í að hætta kannski alveg strax að framleiða börn.

Já og svo eitt í lokin: Mikið var ég hissa á því að maður þarf að borga fyrir að leggja á bílastæðum spítalans...HNEYKSLI SEGI ÉG, HNEYKSLI!!!

Næsta vika:

Mánudagur: Innskrift og undirbúningur.
Þriðjudagur: Röntgenmyndataka.
Fimmtudagur: Aðgerð.

Þetta stefnir í afar áhugaverða viku. Nýr kafli í reynslubókina sem er eiginlega byrjaður að skrifa sig. Ætli það sé ekki best að taka því bara rólega um helgina og njóta tilverunnar og tímans með karlinum og krökkunum. Þetta verður allt í lagi, ég er búin að ákveða það.

Svakalegur léttir var að fá símtalið frá spítalanum í dag og að heyra að eitthvað prógramm er farið í gang. Ætli ég verði ekki að gefa honum annan séns eftir að ég reiddist honum svo mikið um daginn fyrir að vilja ekki taka á móti mér í skoðun. Mér var víst troðið í aðgerðina á fimmtudaginn, fegin er ég. Kannski ætti maður bara að hafa einhverja trú á þessu heilbrigðiskerfi eftir allt saman.

Það er ferlega skrítið hvernig heilinn í manni virkar. Núna þegar ég veit hvað þetta er, finnst mér ég finna miklu meira fyrir því. Ég er samt alls ekki kvalin, ég bara finn þetta einhvernvegin betur. Þetta er aðskotahlutur sem ég þrái að losna við og það sem allra fyrst.

Ferlega getur maður líka verið klikkaður; ég er farin að hlakka til að lesa og lesa og kannski skrifa líka og teikna á meðan ég er að jafna mig...hehehe alltaf gott að hafa eitthvað til að hlakka til.

Ég er oft í hálfgerðum vandræðum með hversu persónulegt ég vil hafa þetta blogg mitt. Núna er komið upp mál sem ég hef aðeins þurft að hugsa mig um hvort ég ætti nokkuð að vera að skrifa um. Eftir smá umhugsun ákvað ég að gera það...í "versta" falli fengi ég kannski bara stuðning og jafnvel reynslusögur frá öðrum.

Málið er að á mánudaginn fór ég til kvensjúkdómalæknis og þá kom í ljós að ég er með æxli við eggjastokkinn. Læknirinn gat ekki með sínum tækjum mælt nákvæmlega stærðina né séð frá hvorum eggjastokknum þetta er. Hún sagði samt að þetta væri a.m.k. kíló og er svipað að stærð eins og legið þegar kona er gengin 16 vikur á meðgöngu. Það eru 85-90% líkur á því að þetta sé góðkynja og ég held að það komi ekki í ljós fyrr en ég verð skorin upp. Ég bíð núna eftir að spítalinn kalli mig í aðgerð.

Ég er þess vegna kannski svolítið skrítin þessa dagana og get ekki beðið eftir að komast í aðgerðina. Það er samt rosalegur léttir að hafa fengið þessa skoðun eftir að spítalinn neitaði að taka við mér fyrir nokkru! Ég veit núna a.m.k. hvað er í gangi því ég vissi að eitthvað væri þarna, ég finn svo greinilega fyrir þessu.

Ég hef ekkert verið veik og líður þannig séð vel. Þetta er bara ónotatilfinning sem ég vil endilega losna við og komast í aðgerðina sem fyrst svo hægt sé að skera þetta burt. Þá vitið þið hvar ég er ef ég skyldi nú hverfa aðeins frá blogginu.

Takk svo mikið fyrir gærkveldið sæta fólk! Hlakka til næst!

Love ´yall!!!

Nú bara verð ég:

ÉG ÞOLI EKKI ÞESSA AUGLÝSINGU Í ÚTVARPINU:

ÖRUGGAN STAÐ TIL AÐ VERA ÁÁÁÁÁ

HVAÐA RUGL ER ÞETTA EIGINLEGA? HVAÐ ÞÝÐIR ÞETTA? ER MAÐUR AÐ LEITA AÐ ÖRUGGUM STAÐ TIL AÐ VERA Á ÞEGAR MAÐUR KAUPIR SÉR BÍL? HVER TALAR SVONA EIGINLEGA? ÉG SKIL ÞETTA BARA EKKI!!! ER ÞETTA SEINNI HLUTI ÚR SETNINGU EÐA .....???? OOHHH ÉG FÆ GRÆNAR...

Vanti einhvern ódýran svefnsófa, 140 sm breiðan, vil ég losna við svoleiðis!

Smá könnun hérna:

Horfa börnin ykkar á Stundina okkar? Finnst þeim hún skemmtileg? Hvað er skemmtilegast og hvað er leiðinlegast? Hvað finnst börnunum ykkar skemmtilegast af barnaefni í sjónvarpinu (á hvaða stöð sem er) ? Hvað finnst ykkur fullorðna fólkinu um Stundina okkar? Horfið þið á hana með börnunum?

Þátttakendur verða ríkulega verðlaunaðir fyrir framlag sitt!

Vá hvað ég er þreytt núna. Svo þreytt að mér finnst full þörf á því að blogga um það á heimsnetinu. Ég þrái svo mikið að komast í smá frí. Okkur hjónaleysunum veitir sko ekki af því að fara í smá horny moon ferð . En hvernig fer maður að þegar enginn getur tekið börnin yfir helgi?

Nú er sko mál að linni með þessar framkvæmdir á okkar tæplega 70 fm íbúð. Það er sko ekkert grín að standa í þessu...segi ég sem geri ekkert af þessu, -heldur Smári, duglegi Smári. En það tekur á að hafa allt út um allt vikum og mánuðum saman. Við erum búin að gera ótrúlega margt í íbúðinni síðan við fluttum heim og ekki er allt búið enn. Hjónarúmið er búið að vera í stofunni í nokkra daga núna og því ekki vel sofið sem er ekki ofan á þreytuna bætandi.

Jæja, þetta er nú aldeilis spennandi lesning og ein af þessum færslum sem ég hugsa "til hvers að blogga um þetta" -en geri það samt. Skítt með það! Ég ætla að fá mér bjór í kvöld og hætta að vera með hugann við vinnuna eða heimilið og hitta skemmtilegt fólk. Það er þó tilbreyting og smá frí frá hversdeginum. Ótrúlegt að maður sé alveg kominn í pakkann, "vinna, éta, sofa"....uss það gengur ekki...

TÍMAMÓT!!!!

Sum tímamót eru gleðileg en ég á voðalega erfitt með að gleðjast yfir þeim sem eru hjá mér núna.

Ég er að verða gráhærð!!! Fyrstu ellimörkin farin að láta á sér kræla og ég sem var að fermast í gær!!!

Jæja, hvað segið þið? Hvernig fundust ykkur svo Laugardagslögin???

Mig dreymdi að tennurnar mínar væru að brotna ein af annarri. Hvað ætli það þýði?

Ég virðist aldrei ætla að læra að það er algjört jinx að vera með yfirlýsingar. Heldur ekki að ég er svo mikill sykurfíkill að ég held í alvöru talað að ég þurfi hjálp. Ég þarf örugglega að fara í meðferð og 12 sporin eða eitthvað. Vandamálið er að mig langar það ekki nógu mikið þó að ég viti að þetta gengur bara ekki lengur. Ég ætla bara að hætta að hugsa um þetta.

Jahérna bara komin ein enn helgin og jeminn hvað veðrið er fallegt. Ég er heima í dag með HM því það er starfsdagur á leikskólanum svo við fórum aðeins út áðan að njóta veðursins...lovely!

Það er alltaf sama sagan með mig...togstreitan með frítímann og þrifin...bleeeöö. Er nú samt að hugsa um að bíta á jaxlinn, bretta upp ermar og spíta í lófana og drífa í þessu helvíti, -þá verður það búið og ekki hægt að hugsa um það meir...þangað til næsti skítur þarfnast þrifnaðar and so on and so on. Eða æ nei ég veit það ekki, ég NENNI ekki að þrífa....ohhhh! Ætlaði bara aðeins að blogga fyrst.

Verð að segja að eitt fer hrikalega í taugarnar á mér þessa dagana. Þessi umræða um ástandið í miðbænum, löggan vill loka stöðunum fyrr og færa þá sem yrðu opnir lengur úr miðbænum! Hvaða djöfulsins rugl er það? Heldur maðurinn (lögreglustjóri Rvk.) virkilega að það sé eitthvað betra? Að það breyti einhverju nema kannski að færa hluta af liðinu eitthvað annað? Svo þetta með bjórkælinn...það var náttúrulega ekkert annað en kjánaskapur hjá borgarstjóranum. og bæðevei ótrúleg völd sem felast í því að geta fyrirskipað svonanokkuð! En er ekki best að greina vandann aðeins betur og reyna svo að ráðast að rótum hans frekar en að blása á reykinn? Vandamálið er auðvitað samfélagslegt, sálfræðilegt. Vandamálið er allur þessi fjöldi fólks sem sér sig knúið til þess að drekka sig fullt og/eða dópa sig og jafnvel nauðga og berja, brjótast inn og ég veit ekki hvað og hvað helgi eftir helgi og dag eftir dag. Af hverju? Jú væntanlega vegna þess að þeim finnst annars lífið óbærilegt, það verður að deyfa sig með áfengi eða dópi til þess að meika veruleikann, komast í gegnum daginn, nóttina, helgina, vikuna, mánuðinn, árin. Þetta er kjarni málsins! opnunartími skemmtistaða hefur akkúrat ekkert með þetta að gera. Skemmtistaðirnir eru bara að svara eftirspurn markaðarins. Eftirspurnin minnkar ekkert þó að skemmtistaðir breyti opnunartímum eða færist annað. Ef fólk ætlar að drekka, dópa og skemmta sér, þá gerir það það. Ef yfirvöld vilja virkilega gera eitthvað í þessu þurfa þau að spyrja sig að því hvað veldur þessari hegðun. Skoða svo hvað hægt er að gera í málinu. Það er greinilegt að það er eitthvað að. Af hverju talar enginn um þetta?

Pjúff...þá er það komið út! Anyways....ég verð einstæð móðir allan daginn á morgun og eitthvað fram á kvöld svo að ég er mjög til í einhver mannleg samskipti anyone?

Æ er þetta veðrið eða bara almenn þreyta? Mér líður eins og undinni tusku, það er akkúrat engin orka eftir. Ég vil bara kúra undir sæng og dotta yfir sjónvarpinu forever. Iss, en jæja mér tókst samt sem áður að taka til, ryksuga og þrífa baðherbergið. Ég á líka afskaplega bágt með að slappa af með skítinn í kringum mig. Ég hef sagt það áður og segi það aftur; það vantar þriðja daginn í helgina. Hvernig á maður að ná að þrífa, gera eitthvað með börnunum og makanum og liggja í leti og gera það sem maður náði ekki að gera í vikunni og heimsækja vini og ættingja eða fá þá í heimsókn á tveimur dögum? Ómögulegt.

Var að hugsa (ótrúlegt en satt!) hvort það væri ekki tilvalið að halda DK partý svona eins og aðra helgi í október? Ætli myntan í garðinum mínum verði nokkuð orðin ónýt?

Já, jæja það er ekki mikið bloggað þessa dagana hjá mér. Enda er ég öll í því að lenda og aðlagast nýju vinnunni. Þetta leggst allt saman vel í mig. Lifandi vinnustaður, fjölbreytt verkefni og gott fólk. Það er virkilega gaman að fá að kynnast þessu, hvernig sjónvarpið er á bak við tjöldin. Til dæmis var ég í spurningaliði í dag þegar var verið að æfa nýja spurningaþáttinn sem verður í beinni á föstudagskvöldum. Ég er alltaf að læra eitthvað nýtt á hverjum degi. Það er svo skrítið að mér finnst á einhvern furðulegan hátt eins og ég hafi alltaf verið að vinna þarna. Mér líður eins og ég sé loksins komin "heim". Þetta er eitthvað "meant to be" dæmi. Furðulegt og gaman : )

Fjúff...erfið vika maður. Er búin að vinna 11 til 12 tíma alla daga því ég hef verið að fara í Sjónvarpið eftir hina vinnuna til að fá smá kennslu í nýja starfinu. Eeeen á morgun er föstudagur og men ó men hvað ég er ánægð með það. Ég sit hérna við tölvuna og get varla pikkað rétt inn út af þreytu og er líka að borða popp. Ég er búin að vera mjög dugleg á danska mataræðinu og veit að granna ég er smám saman að koma í ljós ;) Ókei poppið er ekki part af programmet en skítt með það. Reglur eru til þess að gera undantekningar. Ég held að þetta verði frábær helgi og ég ætla að byrja hana á því á morgun að halda upp á að ég sé að hætta í vinnunni minni og byrja í annari..veiii. Á laugardaginn er planið að kaupa eitthvað af fötum. Maður getur nú ekki verið í gömlum lörfum í nýrri vinnu, það bara passar ekki. Svo á sunnudaginn á ég von á fullt af frændfólki til mín í súpu.

Jæja, þá er fyrsta nokkurskonar vinnudegi lokið. Fór sem sagt þegar ég var búin á bráðum gamla staðnum niðrí tíví að sjá og kynnast aðeins starfinu. Þetta leggst allt saman vel í mig. Verður mikið að læra til að byrja með en það er bara áskorun sem verður gaman að takast á við.

Ohh það jafnast ekkert á við rauðvínsglas og Leiðarljós eftir erfiðan dag...

OMG sumir hlutir eru bara of góðir til að vera sannir....en eru það samt!!!

Ég fékk djobbið í Sjónvarpinu :)

Jæja þá byrjar ballið á morgun. Danskurinn blessaður. Búin að versla inn og gera ráðstafanir, áþreifanlegar sem óáþreifanlegar. Markmiðið hefur verið sett og nú er ekkert annað að gera en að hefjast handa og missa ekki sjónar á markinu...vííííí

Vildi bara að ég hefði félagsskap í þessu, en nenni samt ekki á þessa fundi. Látið mig vita ef einhver ykkar ætlar líka á danska. Það er svo gaman að skiptast á uppskriftum og bera saman bækur sínar og svona.

Megi þið eiga góða viku framundan!

Ég finn það, þetta er að koma. Ég er alveg að verða tilbúin. Ég er komin með það mikið nóg að nú veit ég hvað ég þarf að gera og ég veit að þetta er rétt ákvörðun. Alveg eins og þegar ég ákvað að hætta að reykja. Mér finnst eins og ég standi á barmi kletts og horfi niður, þangað sem ég ætla að stökkva. Ég er bara aðeins að virða fyrir mér útsýnið fyrst. Ég hef tekið eftir því að það hefur ekki reynst vel að gefa frá sér yfirlýsingar því þá er svo hætt við því að ekkert verði úr áformunum góðu. Ég ætla því að sleppa yfirlýsingum en skrifa bara svona það sem ég er að hugsa.

Ohh svo verð ég einstæð móðir frá morgundeginum og þangað til á laugardagsnótt. Þannig að þá verð ég líklegast að dandalast eitthvað ein á laugardaginn með strákana mína í menningunni. Jæja, ég losna þó við timburmennina sem hefðu þó verið neglandi og sagandi af áfergju í hausnum á mér reikna ég með ef ég kæmist í DK sumarbústaðarhittinginn sem ekkert útlit er fyrir. Kannski að maður hitti einhvern sem maður þekkir í mannhafinu. Guð þetta verður örugglega rosalega gaman, ég hef einu sinni farið í bæinn á menningarnótt og það var fyrir nokkrum árum...hlakka til.

Jæja þá er það opinbert: Þetta sem ég var að gera um daginn og gat ekki sagt hvað var, það var sem sagt það að ég var að segja upp vinnunni. Ég vinn út ágústmánuð og svo byrja ég vonandi á nýjum stað í byrjun september. Ég er auðvitað með alla anga úti og auglýsi hér með sjálfa mig sem lausan vinnukraft. Til í skemmtilega vinnu og góð laun, eins og allir hahah. Við búum í svo litlu samfélagi þar sem allir þekkja alla svo einhver sem les þetta þekkir kannski einhvern sem þekkir einhvern og svo framvegis. Aldrei að vita!

Hvernig vinnu vil ég? Því er ekki auðvelt að svara. Eigum við ekki að segja bara að mig langi í vinnu hjá stóru eða meðalstóru fyrirtæki þar sem mikið er um að vera og góður andi ríkir. Að ég fái tækifæri til að nota tungumálakunnáttu mína og sýna hvað í mér býr og möguleika á að vinna mig upp í starfi. Best væri ef starfið væri á viðskipta/markaðssviði. Mig langar að finna mér stað sem ég verð á í einhver ár. Ég nenni ekki neinu flakki. Ég er opin fyrir allskonar tækifærum en verð að segja nei takk við afgreiðslustörfum og helst ekki símasvörun/móttöku. The only way is up, baby!

Ef frekari upplýsinga er óskað get ég sent CV-ið mitt á viðkomandi.

Já og gaman að minnast á það í leiðinni að ég fékk 2 ár metin í viðskiptafræðina, þannig að ég á bara 3ja árið eftir, auk eins fjármálakúrs! Jibbí, hvað ég er glöð með það. Ef ég hefði efni á því, vildi ég helst bara klára þetta á einum vetri en það er bara ekki í boði eins og staðan er í dag.

En jæja, kæru vinir og vandamenn, sem sagt þið megið gjarnan hafa augu og eyru opin fyrir mig og ekki hika við að hafa samband ef þið vitið um einhverja vinnu sem gæti hugsanlega passað mér! Til dæmis á e-mail regina101@gmail.com, eða bara hringja!

Takk!

Kæra "vinkona"!

Mér þykir verulega vænt um hvað þér er annt um mig og mína hagi. Mér þætti gaman að hitta þig og sötra með þér kaffibolla, nú eða rauðvínsglas (ef þú hefur aldur til!) við tækifæri svo við getum nú rætt málin almennilega. Ég hef nefninlega ekkert að fela, öfugt við þig. Nú ef þú ert ekki til í það, þá verð ég bara að taka því og halda áfram að vera upptekin af eigin vandamálum og blogga um þau líka.

Ég get ekki að því gert en ég velti því fyrir mér hvað þér gengur til með þessum nafnlausu kommentum á blogginu mínu. Ég held samt að ástæðan sé frekar augljós: Þig vantar athygli. Þig vantar athygli svo mikið að þú heldur áfram að láta á þér kræla þó þess sé ekki óskað, bara til að athuga hver viðbrögðin eru. Þig vantar athygli svo mikið að þér er alveg sama þó þú fáir hana án þess að þeir sem veita þér hana viti hver þú ert.

Ok, kannski vantar smá spennu og dramatík í þetta annars ómerkilega blogg mitt. Ég skal alveg viðurkenna það og þér tókst sannarlega að hræra aðeins upp í þeirri deild. En veistu, ég mæli með því að þú beitir kröftum þínum og hæfileikum í aðrar áttir þar sem þeirra er þörf. Kannski þarftu bara á þeim að halda í þínu eigin lífi? Ég er nú enginn sálfræðingur en stundum er ágætt að beita speglinum ef þú skilur hvað ég meina? Þetta er nú kannski orðið svolítið neyðarlegt allt saman er það ekki?

En ok kæru lesendur og alvöru vinkonur: Ég held að við ættum ekki að leyfa þessari svokölluðu vinkonu að komast upp með að vekja svona óþarfa athygli á sér. Ég legg til að við bara einfaldlega "ignorum" hana og látum sem hún sé ekki til. Það er að segja ef hún gefur sig ekki fram og vill hitta mig kannski bara? -Nógur er áhuginn á mér amk.

Jeminn hvað ég er fegin að blessuð verslunarmannahelgin er að verða búin. Frétta- og fjölmiðlasjúklingurinn ég hef átt frekar bágt þessa dagana að hlusta á og horfa á endalausar "fréttir" af hátíðum um allt land. Hrikalega leiðinlegt maður! Hverjum er ekki sama hvort tókst að setja heimsmet í Hornafjarðarmanna eða ekki? Ég skil ekki af hverju þarf að vera með svona svakalegar fréttir og útsendingar af verslunarmannahelginni. Hver er að hlusta á þetta (fyrir utan mig) ? Eru ekki allir annað hvort uppteknir af því að vera á ferðalagi, á útihátíð eða eru heima hjá sér? En það er náttúrulega algjör gúrkutíð í gangi og fjölmiðlafólkið verður jú að standa sig í vinnunni.

Annars hefur mér síður en svo leiðst í fríinu. Við Smári höfum verið ótrúlega dugleg að mála og snurfusa kofann okkar. Við létum sko peningaleysið ekkert stoppa okkur, heldur drifum í því sem kostaði lítinn pening og eignuðumst nýja eldhúsinnréttingu með því að lakka hana hvíta. Lökkuðum líka gluggakarma þrjá og abrakadabra...ný stofa! Smári sagaði svo út nokkrar hillur og lakkaði líka...já allt í gangi bara! Svei mér þá, þetta fer bara að verða eins og hjá fólki!

Gummi ammánt, sa er so góra sturi ér. So skammpala a vera ér ísa sturi nú wwúúúú!!! Er annsiggi a tapaessa glóris wei wei wei!!!

Skildi þetta nokkur?

Mbl í dag:
Steingeit: Tengsl þín við peninga byggjast á innsæi. Treystu því og þú munt hagnast. Í kvöld ertu dularfullur og laðar að þér vatnsmerkin krabba, sporðdreka og fiska.

Þetta er magnaður andskoti! Ég er að verða rík og laða að mér Smára í kvöld á dularfullan hátt... úúúúú....

vei vei vei...ég fór í atvinnuviðtal í gær út af mjöööög spennandi starfi, gekk svaka vel. Ég er svo spennt, þetta skal ganga upp!

Skattmann þú svikaradjöfull...þetta skal ég sko muna!

Mbl. í dag:

Steingeit: Þú ert sérlega næmur, skilningsríkur og samúðarfullur við fólkið sem þú elskar - og líka við það sem þú þekkir varla. Það er þitt framlag til friðar á jörðu.

...svo satt, svo satt.

Systur mínar tvær, Gummi bróðir minn og Benni.

Gummi sæti, María sæta og Helena sæta.

Á leið norður á Illugastaði í sumarbústað

Að sjálfsögðu var slummað í sig hammara í Borgarnesi

(ekki í Hyrnunni, nei takk!)

Það er skylda að taka mynd með Akureyrarkirkjuna í bakgrunn.

Dúlli að róla á Illugastöðum.

Það furðulega gerðist í morgun að allt í einu mundi ég hvað var svona sérstakt við 22. júlí en það hafði verið eitthvað að bögga mig svona undir niðri. Það var dagurinn sem Goggi litli bróðir dó fyrir 7 árum. Ég veit ekki hvernig ég á að taka þessu. Fram að þessu hefur þessi dagur aldrei farið fram hjá mér en núna var þetta semsagt svona. Þetta er sumsé bara lífið að halda áfram eða hvað?

Það er samt langt frá því að ég gleymi Gogga mínum...aldrei.
Blessuð sé minning hans.

Jæja, bara vika síðan síðast. Það er nú bara því það er ekkert að frétta eiginlega. Ég er reyndar búin að hitta og fá í gistingu hálfsystur mína frá Noregi og á von á henni aftur á morgun. Svo ætlum við þrjú hálfsystkyni að hittast vonandi í næstu viku. Gaman að því.

Ég er annars bara búin að láta vikuna líða, vinnandi frá 9-5. Það er alveg ofurrólegt og lítið að gera í vinnunni. Það reynir sko á þolinmæði og útsjónarsemi að tapa sér ekki úr leiðindum þegar svona stendur á. Það er eiginlega ekki heldur ofan á ástandið bætandi að allir strákarnir mínir eru í fríi á meðan ég hangi á skrifstofunni. Ég var eiginlega bara dauðfegin að fá rigningu svo ég þyrfti ekki að missa af góðviðrinu.

Adíós amigós! Ég ætla að njóta helgarinnar með fjölskyldunni sem ég sakna allan daginn!

Mikið er nú gott að vera komin heim í kotið mitt litla. Nú klæjar mig í fingurna að fara að gera eitthvað fyrir hann blessaðan. Ég vona bara að skattmann standi við sitt þetta árið eins og vanalega og ausi yfir mig dálítið af þúsundköllum svo að hægt verði að fegra kotið aðeins.

Ferðasagan er stutt. Við fengum sól hvern einasta dag. Fórum eiginlega ekki neitt að skoða nema jólahúsið, Vaglaskóg og Akureyri. Átum eins og svín, meðal annars urriða veiddan af Smára og Benna í Ljósavatni...ekki ónýtt það. Bústaðurinn var góður, Benni sagði að hann væri flottari en íbúðin okkar ha ha ha! Geðveikt að hafa örbylgjuofn og slátruðum við 8 örbylgjupopppokum léttilega! Potturinn stóð líka fyrir sínu. Ég varð nánast ástfangin af Akureyri og nágrenni. Þvílík dásemd!

Og ég er búin að panta að næsta ferðalag verði barnlaust...eins yndislegir og strákarnir mínir eru þá er kominn tími á kærustuparsferð og það fyrir löngu. Ég get svarið það að á því 13 og hálfa ári sem við Smári höfum verið saman höfum við aldrei farið tvö í ferðalag. Þá tel ég ekki með eina sumarbústaðarferð þegar ég var kasólétt af Benna. Hann var eiginlega með.

Haldiði að ég hafi ekki barasta komist í tölvu og á netið hér fyrir norðan. Bjóst alls ekki við því, þá er nú nauðsynlegt að blogga aðeins. Semsagt bústaðurinn er frábært, veðrið gæti ekki verið betra. Allir í góðu stuði. Við erum bara að drepast úr hamingju og notalegheitum. Erum búin að fara til Akureyrar að versla í Bónus og smakka Brynjuís sem er bæðevei góður. Fyndið að á rúnti okkar um bæinn vildi svo til að Jóhannes himself stóð úti í garði einum og talaði í símann. Svo sáum við Sniglabandið sitja úti á kaffihúsi. Bara allir frægir haaaa? Akureyri er bara megasætur bær og minnir mig á danskan smábæ. Eigum eftir að tékka á sundlauginni, Nonnasafni og jólahúsinu. Það er eflaust eitthvað fleira hægt að gera. Við tökum bara lífinu með ró og njótum þess í botn.

Læt þetta nægja í bili.

Þá er það búið. Ég er frjáls. Af tillitssemi við hlutaðeigandi get ég ekki sagt strax hvað ég var að gera. En stóru fargi er af mér létt og nú er bara að horfa fram á veginn og gleðjast yfir því sem framtíðin ber í skauti sér. Meðal annars að við fjölskyldan ætlum að bruna norður í sólina á morgun í sumarbústað.

Bæjó í bili!

Jæja, úff og púff...í dag verður klippt á kvíðahnútinn. Einum degi fyrr en áætlað var. Ég er búin að vera í hálfgerðri hugleiðslu upp á síðkastið til að reyna að vinna á móti kvíðanum. Segi sjálfri mér að ég hafi ekkert að óttast og þurfi þess vegna ekki að kvíða neinu. Ég sé sigurvegarinn. Ég geti ekki stjórnað umhverfinu, bara mínum eigin viðbrögðum og gjörðum. Þetta verði allt í lagi. Ekkert breytir því að sólin skín, að ég elska börnin mín og manninn minn. Hvað sem gerist, breytist það ekki (nema það rigni ha ha ha). Ég verð frjáls og það er í mínum höndum. Það er nauðsynlegt að hafa smá kæruleysi í gangi, borgar sig ekki að taka lífið of alvarlega.

Æ, gott að ég skrifaði þetta. Ég ætla að lesa þetta nokkrum sinnum yfir í dag til hjálpar.

So whish me luck! I can do it!

Úpps! Við gleymdum að gera ráð fyrir fimmta fjöskyldumeðlimnum, kettinum Felix í sumarbústaðarferðinni okkar. Við erum sem sagt að fara snemma á föstudagsmorguninn á Illugastaði og ætlum að koma heim viku seinna, föstudaginn þrettánda (úúúú).

Datt í hug hvort ég þekkti ekki einhvern snilling sem getur passað kisa fyrir okkur á meðan???

Ha?

Mikið svakalega líður tíminn hægt núna. Ég vorkenni sjálfri mér voða mikið að vera lokuð inni á skrifstofu frá 9-5 í þessu góða veðri. Sit hér við tölvuna og horfi út á Esjuna og sé að sjórinn er spegilsléttur og svei mér þá ef það er ekki bara logn líka! Meira segja hér á Suðurlands-bratutinni. Þetta væri skárra ef eitthvað væri að gera. Ó well...ég reyni bara að búa mér til verkefni. Meðal annars að grafa upp kæruleysi sem móteitur við kvíðanum sem hrjáir mig þessa daganna. Ég losna þó líklegast við hann á fimmtudaginn. Fjúkkit, hvað það verður mikill léttir maður! Og svo verður bara brunað í sumarbústaðinn á föstudagsmorgun. Get ekki beðið!

Jahérna. Ég get svarið það að ég er komin inn úr steikinni í garðinum mínum. Ég er í smá pásu frá sólinni, held ég sé bara að grillast. Það er pottþétt um 30 stiga hiti í garðinum núna. Ok nú lagar mig ekki að flytja neitt. Þetta er algjör paradís! Spurning um að skoða það fyrir alvöru að byggja við kofann og bæta í staðinn fyrir að flytja í stærra og missa þá garðinn. Það er náttúrulega algjör lúxus að hafa svona suðurgarð sem gengið er út í beint úr stofunni. Sé fyrir mér hvar heiti potturinn verður, kryddjurtagarðurinn, blómabeðið, kartöflurnar, gulræturnar, rabbarbarinn...endalausir möguleikar...ef ég vil.

Tíminn í sólbaðinu hefur farið í hálfgerða hugleiðslu. Ég tók mér stílabók og penna í hönd og skrifaði niður 5 markmið fyrir sjálfa mig. Svo skrifaði ég strategíu til að ná þessum markmiðum og tilganginn með þeim. Ég er ekki búin ennþá en finn að þetta léttir strax á mér. Ég tók ákvörðun í leiðinni sem er búin að velkjast um með mér lengi. Ég þurfti eiginlega að gera upp við mig hvort ég ætti að fylgja skynseminni eða fara eftir innsæinu í ákveðnu máli og það varð úr að ég valdi síðari kostinn. Ef þú lesandi góður ert forvitinn að vita hvaða mál þetta er, kemur það í ljós á næstu dögum, get ekki sagt strax hvað það er.

Jæja best að halda áfram að safna brúnku!

Einu sinni var Pétur. Hann var frábær strákur, ótrúlega hæfileikaríkur og ótrúlega góður. Hann datt niður af húsþaki og dó þegar hann var bara tvítugur. Ég, jafnaldri hans og margir fleiri fengum sjokk. Ég þekkti hann ekki náið en nóg til að reiðast og syrgja dauða hans mikið. Þetta allt saman rifjaðist upp fyrir mér núna í vikunni þegar ég sá myndband sem vinir hans gerðu í minningu hans eftir að hann dó. Þar sá ég upptöku af honum þar sem hann birtist ljóslifandi fyrir mér og ég mundi eftir honum eins og ég hefði hitt hann í gær, þó það séu 13 ár síðan. Það rifjaðist upp fyrir mér líka hvað það er ósanngjarnt þegar ungir krakkar deyja í blóma lífsins og framtíðin bíður eftir þeim. Svo margt sem þeir eiga eftir að upplifa en fá ekki tækifæri til. Og ástvinir standa eftir með minninguna og spurninguna AF HVERJU??? "Þeir sem Guðirnir elska, deyja ungir" Hvaða huggun er það? Ég hef aldrei skilið þessa setningu. Á maður þá bara að hugsa, jæja þetta er allt í lagi guðirnir elskuðu hann svo mikið að hann varð að deyja ungur? Hvaða bull er það? Á það að fá mann til að líða betur? Það er ekkert sem breytir ósanngirninni, sorginni og örvæntingunni þegar ungir krakkar deyja eða hver sem er, þegar út í það er farið. En að sama skapi verður maður að sætta sig við að ekki er hægt að breyta því sem orðið er og eins gott að lifa með því. Og halda minningunni á lofti, þannig lifa þeir sem deyja áfram í okkur.

Já og enn sveimar hugurinn...hvað langar mig mest? Að búa í miðbænum, vesturbænum, úti á landi, í Álfheimunum, í neðra Breiðholti eða í Kaupmannahöfn eða ude paa landet i DK? Kostir og gallar allstaðar, veit ekkert í minn haus. Kannski maður ætti þá bara að skella sér til Ástralíu?

Jamms, komin heim í borgina, eða ofvaxna þorpið Reykjavík. Mikið gott í Flatey, frábært veður og gott fólk og góður matur. Smári og Benni orðnir árinu eldri. Ég bara reyni að taka öllu með ró. Er komin enn einu sinni í bloggkrísu, veit ekki hvort ég nenni þessu. Mér finnst svo gaman að lesa hjá öðrum og finnst gott að halda kontakt við fólk í gegnum bloggið þannig að það er varla stætt á öðru en ég sjálf rugli eitthvað hérna líka...eða hvað?

Okei bæ, farin í Flatey. Má ekkert vera að þessu, þarf að gera 100 hluti áður en við leggjum af stað eftir klukkutíma...víííí........

Ég held að þetta sé að lagast, takk fyrir ráðin, ég veit þið meinið vel. Þetta er bara eins og eitthvað eitur í líkamanum sem ég ræð ekkert við. Ég held áfram að berjast og veit að hlutir eins og hreyfing, skynsamlegt mataræði, nógur svefn og jákvæður hugsunarháttur eru meðalið. Það er ekki eins og ég vilji ekki brjótast út úr þessu, alls ekki. Vá hvað ég vildi vera laus við þessa böl en þetta er víst partur af mér og eins gott að læra að lifa með því.

Aumingja ég að vera ég...stundum. Úff ég er svo sveimhuga. Þetta flotta orð heyrði ég um daginn. Mér finnst það eiga ágætlega við mig. Hugur minn sveimar úr einu í annað. Óþolinmæðin er að drepa mig. Skynsemin verður þess vegna oft á undanhaldi. Ég er alveg hryllilega ójarðbundin. Er sveimhuga ekki bara bara andstæðan við jarðbundin? Svo verð ég líka svo full af þráhyggju stundum að ég get bara ekki hugsað skýrt, hvað þá skynsamlega. Þetta er hægara sagt en gert, að vera ég. Ofan á allt þetta bætist svo baráttan við þunglyndið sem ég fæ þó stundum hvíld frá sem betur fer.

En ég er ekkert að rakka mig niður. Ég á líka mínu góðu hliðar og stundum geta gallar verið kostir í sjálfu sér. Það er líka nauðsynlegt að horfast í augu við eigin galla...og kosti.

Ég er sem betur fer að fara úr borginni næstu helgi á ættarmót í Flatey á Breiðafirði. Þar næ ég oftast báðum fótum á jörðina og fæ ómengaða orku náttúrunnar.

Today is the first day of the rest of my life!

Ég ætla að freista gæfunnar með 8-4. Það er ótrúlegur munur að vera búin klukkan 4 í stað 5. Veit einhver um góða vinnu handa mér? Það er sko leyndó ussss!

Það rifjaðist upp fyrir mér í dag að ég er engin 9-5 manneskja. Mér eru ætluð önnur örlög í þessu lífi.

æ þetta er allt saman hundleiðinlegt!

Er nokkuð laus íbúð/herbergi á kollegíinu í viku á bilinu 28.júní til 11.júlí fyrir einn frænda Smára?

Æ já bara voða lítið að segja núna. Dagurinn í dag átti að fara í allskonar aktivítet en það varð ekkert úr því sökum þreytu. Ég ætla ekkert að hafa móral yfir því. Sem betur fer er þetta löng helgi. Það er ýmislegt sem við þurfum að gera við íbúðina áður en við setjum hana á sölu og eins gott að koma sér í gírinn. Mér finnst bara einhvernveginn aldrei tími til neins þegar ég er að vinna 100% vinnu. Hvernig verður þetta þá þegar ég er byrjuð í fjarnáminu líka? Maður var náttúrulega orðinn ansi góðu vanur úti í Danmörku og það er erfitt að aðlagast allt öðruvísi lífi hér á Íslandi. Það er samt ekki bara það...mér hefur alltaf fundist ég þurfa meiri tíma þegar ég er í vinnu. Kannski finn ég þetta bara af því ég hef enn ekki komist í draumastarfið. Ég held að þegar maður er í skemmtilegu, gefandi og vel launuðu starfi sé róðurinn léttari. Ég stefni þangað, veit bara ekki enn hver þessi vinna er en kemst að því með tíð og tíma.

Þá er það færsla dagsins. Hmmm það sem er mér efst í huga núna er megrun, megrun og aftur megrun. Mér var loksins ofboðið þegar mér var litið í spegilinn um daginn og tók þá ákvörðunina á staðnum og hef staðið við hana síðan. Nú er sko engin miskunn og skal tekið duglega á mataræðinu. Þetta bara gengur ekki lengur. Ekki bara út af aukakílóunum, heldur líka bara líðan. Ég er sko alveg komin með nóg af hausverk, sleni og drullu. Ég er búin að skipta um skoðun svona 120 sinnum undanfarið um hvernig ég eigi að fara að þessu, þ.e. hvaða aðferð ég ætti að nota. Herbalife, danski "kúrinn" eða bara kommon sens. Ég held að ég endi bara á kommon sens sem felst aðallega í að drekka fullt af vatni, meira af ávöxtum og grænmeti, sleppa fitu og sykri eins og ég get. Borða líka fisk oftar og reyna að hreyfa mig meira og minnka brauðát. Markmiðið er að láta kíló fjúka á viku og ég er að pæla í að skrá vigtina niður hjá mér vikulega og halda jafnvel matardagbók og skrá niður hitaeiningarnar. Ég hef gert það áður og það svínvirkaði. Hei vá hvað það myndi virka vel ef ég hefði þetta hér á síðunni. En samt ég get ekki hugsað mér að upplýsa hvað ég er þung...

Er einhver þarna í Kaupmannahöfn sem getur og vill leigja út íbúðina sína tveimur fullorðnum Íslendingum og tveimur börnum af sama þjóðerni frá 14. til 20. júní? Þetta er fyrir frænku hans Smára. Góðri umgengni og skilvísri greiðslu heitið.

Þegar þetta er skrifað er ekki enn komið í ljós hverjir ráðherrar Samfylkingarinnar eru. Það var svo sem ekki neitt sem kom á óvart í ráðherraliði Sjálfstæðisflokksins nema kannski að flokkurinn færi með ráðuneyti heilbrigðismála. Ó mæ god segi ég nú bara, ekki bara við því að þeir eru með þetta ráðuneyti heldur að Guðlaugur Þór er orðinn heilbrigðisráðherra. Úr öskunni í eldinn segi ég nú bara. Nú verða heldur betur stigin skref í átt að einkavæðingu í heilbrigðisgeiranum. Æ, mér líst ekkert á þetta. Menntamál og heilbrigðismál eru máttarstólpar velferðar í þjóðfélaginu og þar verður að tryggja að allir eigi greiðan aðgang að þjónustu á tillits til efnahags eða stéttar. Ég vil samt ekki banna einkaframtök, það má bara ekki verða til þess að hægt sé að græða á heilbrigðis- og menntaþjónustu eins og hverju öðru fyrirtæki. Það er sjálfsagt að bjóða upp á möguleika í menntakerfinu eins og Hjallastefnan er gott dæmi um. Kannski er líka skuggahlið á því þegar fólk er farið að geta keypt sér menntun eins og er jafnvel að gerast með einkareknu háskólana á Bifröst og HR.
Ég veit ekki alveg hvernig einkavæðing á að ganga upp í heilbrigðiskerfinu ef einkastofur bjóða upp á aðgerðir sem kosta mikinn pening en lítinn biðtíma og ríkið býður upp á lengri biðtíma og lægri kostnað. Þýðir það þá ekki að efnameira fólk getur keypt sér betri heilsu á kostnað heilsu efnaminna fólks?
Það verður spennandi að sjá hvernig spilað verður úr hlutunum þetta kjörtímabil og bara hversu lengi þessi svokallaða frjálslynda umbótastjórn á eftir að starfa saman. Mér fannst algjörlega lýðræðislega rétt að þessir flokkar mynduðu ríkisstjórn en hef áhyggjur af heilsu Samfylkingarinnar í kjölfarið. Ég hefði helst viljað sjá vinstristjórn en samt ekki því ég hef litla trú á því að Samfó, VG og Framsókn geti starfað saman...því miður því miður.
Gaman að sjá að það virðist vera lýðræði í gangi hjá Samfylkingunni því það hefur tekið mun lengri tíma að ákveða hverjir verða ráðherrar. Þarna er fólk að tala saman.
Eins og ég var komin með mikið ógeð á pólitík eftir kosningabaráttuna hefur fréttaþorsti fréttamanna undanfarna daga kitlað hláturtaugar mínar mjög.
Hlakka til að heyra stjórnarsáttmálann á morgun. Vonandi eru betri tímar og bjartari framundan á Íslandi í velferðar-, umhverfis- og jafnréttismálum. Ég ætla að reyna að vera bjartsýn þó ég verði að viðurkenna að trú mín á stjórnmálamönnum er afar takmörkuð. Látum verkin tala.
Nú er ég búin að skrifa svo mikið og ég nenni varla að tala um ráðherraskipan Samfó sem er komin núna en ég verð að segja að ég er MJÖG ánægð með að tími Jóhönnu sé loksins kominn!

Góðan og margblessaðan daginn!

Í dag er fyrsti dagurinn í bloggátakinu mínu. Ég ætla að prófa að blogga núna á hverjum degi í heila viku og athuga hvernig það gengur. Þetta var semsagt færsla dagsins jeeee...
Kannski kemur meira...úúú spennandi!

oohhh ekki er þetta veður að hjálpa...snjór hér og yfir 20 stiga hiti úti!

Nei, ég skal hætta þessu væli. Rétt hjá "vinkonu", ég ætla að reyna að lifa í núinu og njóta líðandi stundar. Hægara sagt en gert en ég reyni. Hver ertu annars dularfulla kona? Nú er ég að drepast úr forvitni.

Jæja fórum í dag með HM að gefa öndunum í fyrsta skipti. Honum fannst það ekkert smá gaman. Í dag er svona týpískt gluggaveður...ohh ég hata það. Ég vakna og held að það sé æðislegt veður og svo er bara ískalt...arrrgg.

Ég er alveg gjörsamlega með DK á heilanum núna og er að pæla í leiðum til að flytja út aftur alveg á fullu. Við ætlum að reyna að fara til Köben í heimsókn við tvö í lok sumars eða í haust. Mér finnst ég bara frekar eiga heima innanum öll reiðhjólin, fúlu Danina, heitu sumrin, nálægðina við önnur lönd, Arababúðirnar, ströndina, alla parkana, ódýrari matinn og vínið og æ ég veit ekki, bara fullt í viðbót sem erfitt er að orða. Hér líður mér einhvernvegin eins og ég sé bókstaflega úti á þekju og mér þykir slæmt að vera svona háð bíl og þoli ekki hvað er dýrt að lifa hérna. Auðvitað eru líka kostir hér og gallar úti...en ég veit ekki, mér finnst bara kostirnir stærri úti þegar allt kemur til alls.

Nei nei ekki aldeilis af baki dottin. Boggeddí blogg. Sko það er bara svo hrikalega mikið að gerast í hausnum á mér og fullt af því er bara stöff sem er óblogghæft, því miður. Oft langar mig mikið til að láta bara allt flakka og skrifa allt sem mér dettur í hug en það gengur ekki...neibbs!

Aftur á móti það sem ég get sagt er að við Smári erum búin að ákveða að selja íbúðina og leita okkur að stærri íbúð. Við erum búin að fá fasteignasala til að skoða og meta og eftir svona smá lagfæringar og endurbætur hér og þar ættum við (vonandi) að fá ágætis prís fyrir kofann. Það kom bara "smá" babb í bát uppá tímaáætlunina að gera; Smári brenndist á kosninganótt. Greyjið hann ætlaði að poppa handa mér, ég var endalaust búin að væla í honum að poppa. Það vildi ekki betur til en svo að hann gleymdi pottinum með olíunni í á hellunni aðeins of lengi. Samt var það fáránlega stutt, þetta er þvílíkt öflug eldavél. Þannig að hann er handlama karlanginn. Þetta er annars stigs bruni á tveimur fingrum og smá blettur í lófanum líka...og auðvitað hægri höndin, -hvað annað? Já, þannig að það tekur þá aðeins lengri tíma en áætlað var að selja og kaupa.

Svo erum við alveg í söknunarferli með Kaupmannahöfn, erum eiginlega að drepast, -okkur langar svo út aftur. Meira að segja Benna langar! Gefum Íslandi aðeins meiri séns og sjáum svo til, var eiginlega niðurstaðan. Já já allt í gangi bararabbarbara...

Dóra hvar er síðan þín?

Jahérna, það gengur á ýmsu, það er ekki hægt að segja annað. Þegar við skötuhjúin runnum í hlað í lok vinnudags í gær kemur frumburðurinn hlaupandi að bílnum og æpir eitthvað á pabba sinn og þeir rjúka svo inn í hús. Ég hélt að það væri kveiknað í en nei nei ég mæti Smára á leið minni inn þar sem hann heldur á dauðri rottu ojjjjjjj. Dísús kræst, djöfulsins viðbjóður! Kattarófétið hafði sem sagt fært björg í bú og verið að leika sér að bráðinni í dágóðan tíma áður en hún drapst!

Jæja, ekki nóg með það heldur beið okkar bréf frá starfsmannafélagi Reykjavíkurborgar þar sem stóð að okkur verður úthlutað sumarbústað í júlí! Eitthvað sem við áttum alls alls ekki von á að fá. Jibbí, við erum rosalega ánægð með þetta. Við sem vissum ekkert hvernig færi með sumarið, þá er þetta amk á dagskrá.

Semsagt OJJJJJ og VEIII

Hvað á ég eiginlega að segja í dag. Kosningar, Júróvisíon æ nenni ekki að tala um það. Vorið er að koma, vei! Hitastigið hækkar um örfáar gráður og maður tryllist úr gleði. Hef samt aldrei tíma til að njóta þess því ég er lokuð inni á skrifstofu frá 9-5 og svo um helgar er ég svo löt og þreytt að ég nenni engu. Mig dreymir um að mála myndir, skrifa sögur, föndra og vera með börnunum mínum og liggja þess á milli í sólbaði og fá borgað fyrir þetta allt saman svo ég geti keypt mér það sem mig langar í.

Nú lygnir í dalnum. Allt er með kyrrum kjörum og verður líklegast um sinn. Það er kominn tími til að sýna þroska og þrautsegju. Stundum þarf að fórna til að uppskera.

Mikið er nú gott að vera með svona fínan prívat auglýsingamiðil. Það sem ég ætla að auglýsa eftir núna er semsagt tjald. Eiginlega langar mig mest í fellihýsi en held að það sé allt of mikið fyrir pyngjuna í bili. Málið er að við fjölskyldan erum að fara á ættarmót helgina 23. -24. júní og okkur vantar fjögurra manna tjald svo af því geti orðið. Fyrir utan það langar okkur bara að eiga tjald til að geta ferðast eitthvað meira í sumar. Ergo; vill einhver selja mér fjögurra manna tjaldið sitt eða þekkir einhvern eða þekkir einhvern sem þekkir einhvern eða þekkir einhvern sem þekkir einhvern sem þekkir einhvern o.s.frv? Eða bara að fá lánað tjald þessa helgi væri æði.

Á einhver DDV menuplanið og getur sent mér í tölvupósti á regina101@gmail.com? Ég er búin að týna mínu og er að spekúlera í að gera eitthvað í þessum spikmálum. Ég væri voðalega þakklát...

Leiðindadagur í vinnunni. Hvað er verið að rugla mann svona með að hafa frídag á fimmtudegi? Þetta er alveg glatað bara, gerir mann bara latan. Hann var reyndar ósköp notalegur sumardagurinn fyrsti. Við fjölskyldan skelltum okkur í bíltúr og göngutúr. Fyrst röltum við um Bakkahverfið í Breiðholti þar sem við erum búin að rekast á nokkrar íbúðir á góðu verði í fasteignaauglýsingum undanfarið. Skelltum okkur síðan í bæjinn til að kíkja á brunarústirnar og æ hvað þetta er sorglegt allt saman. Fáránlegt að þetta hús sé farið. Ég man eftir Karnabæ og plötubúðinni þegar ég var alltaf að dandalast þarna sem krakki og unglingur. Svo á ég góðar minningar frá fyrsta deitinu okkar Smára þar sem hann dansaði við mig í fyrsta og eina skiptið fyrir 13 árum á Berlín. Já ég vona að borgarstjórinn standi við orð sín og endurreisi þessi hús sem skemmdust. Hvað var annars með þennan búining hjá karlinum? Hahaha fáránlega hallærislegt. Einhver Bush stæling þarna í gangi eða hvað?

Já við erum mikið í fasteignapælingum þessa dagana. Getur einhver sagt mér hversvegna íbúðirnar í Breiðholtinu eru svona ódýrar? Flennistórar íbúðir allt niður í 17 milljónir! Hvað er málið...eru þetta bara gömlu fordómarnir frá því í denn eða býr bara ruslalýður þarna? Þetta er eitthvað dularfullt finnst mér.

Á hverju er hún eiginlega?

Vei vei...alltaf svo gaman að bæta fleiri bloggurum á linklistann góða. Nú eru það mætar mæðgur; Sara frænka mín og Olga mamma hennar sem mér finnst vera frænka mín líka þó hún sé ekki skyld mér svona blóðlega séð.

Annars er allt í góðu bara. Samningaviðræður standa enn yfir og líkur vonandi í þessari viku.

En kommon...er ég sú eina sem er að eipa yfir þessari Húsasmiðjuauglýsingu?

Vá hvað ég er endurnærð eftir ferskan og mátulega hryssingslegan dag úti á róló með fyrrverandi Danmerkurbúum, börnum og fullorðnum. Eitthvað sem mætti endurtaka reglulega bara. Best að skella inn myndum eins og allir hinir á morgun, finn ekki fjandans snúruna.

Nú er ég ein í koti, Smári í póker og ég að horfa á söngvakeppni framhaldsskólanna, það er nú alltaf stuð. Væri samt alveg til í félagsskap, segi það nú ekki. Benni hefur ekkert gaman að þessu. En Jesús minn kemur enn einu sinni þessi Húsasmiðjuauglýsing "Nýr tími" með gospelkórnum. Ég veit það ekki, mér finnst bara ekki passa að trúarkór sé að selja sig í Húsasmiðjuauglýsingu. Það klingja einhverjar siðferðis-, viðvörunarbjöllur hjá mér. Væri annað ef þau væru að styrkja gott málefni....kommon nýr opnunartími í Húsasmiðjunni!!! Mér þætti gaman að vita hvað þau fengu borgað fyrir þetta. Fyrst ég er á siðferðislegu nótunum...mér finnst bara kúl að halda upp á afmælið sitt á Jamaíka og bjóða öllum vinum og vandamönnum með! Það myndi ég sko bara líka gera ef ég ætti nóg af peningum! Og þetta segi ég ekki bara af því að Björgúlfur er frændi minn (þekki hann sko ekki baun, var bara svona að lauma þessu inn híhí).

Best að skella inn einhverjum gömlum DK handahófsmyndum með, það er orðið allt of langt síðan...snuff snuff, sakna svo mikið...sumar og sól og allt

Ókei ókei, í dag er föstudagur, vonandi til fjár og frama.
Kem með frekari fréttir þegar ég hef þær, seinni partinn eða í kvöld.

Í dag er miðvikudagur og það er gott. Þá er mið vika, jafn langt frá síðustu helgi og í næstu helgi. Annars er það svo sem afstætt. Hjá mér er eiginlega komin helgi á fimmtudegi, ég ákvað það bara einn daginn að ég skyldi framvegis líta svo á. Það er vel. Á morgun er einmitt fimmtudagur en hann gæti orðið harla óvenjulegur og örlagaríkur. Það er líka vel.

Skúbbeddíbúbb!

Eiginlega var það lán í óláni að ég fékk drulluna í nótt. Það hlaut að koma að því að líkaminn segði stopp, hingað og ekki lengra! Ég er í alvöru talað búin að vera í stöðugu nammiáti, gosþambi og ruslfæðisáti síðan um jólin. Búin að bæta á mig fullt af kílóum og dálítið af andlegri vanlíðan sem fylgir þessu matarÆði. Nú hlýtur motivationin að fara að segja til sín, já ég held það bara svei mér þá. Nú þegar ég sé súkkulaði sé ég bara kúk. Þó veit ég fyrir víst að ég get ekki lifað án þess, þannig að ég ætla ekkert að reyna að blekkja sjálfa mig og segjast ætla að hætta öllu súkkulaði- eða nammiáti. Spurning að fara bara skynsömu leiðina í þessu. Allt er gott í hófi bara.

Mig langar að fara eitthvað um páskana. Gott að hugsa um það núna korter í páskafrí Regína! Æ, svo á ég ekki krónu hvort eð er. Hvað er nú hræódýrt ferðalag án gistingar? Jú það er hægt að fara í bíltúr á Þingvelli kannski...jæja sjáum til hvað framtaksleysið og ofátið fleytir mér langt. Böööö upplífgandi í dag bara ha?

Ókei hvað er þetta tagged.com eiginlega? -er ekki að fatta.

ohhh ég sakna Danmerkur svo mikið, er að verða geðveik á þessu peningaleysi, langar stundum í aðra vinnu, gengur ekkert að grennast, heldur fitna bara meira. Æ ó ó ó.

Anyways...ég vil endilega bjóða velkomna á blogglistann minn hana Helenu systur mína. Hún er borinn og barnfæddur Hafnfirðingur (eða á maður þá að segja Gaflari?), býr núna í Mosó með börnunum sínum þremur og manni. Kennari og fyrrverandi fimleikadrottning og dóttir "pabba" míns og sameiginleg hálfsystir flestra hálfsystkyna minna. Að öllu bulli slepptu algjör perla og sææætust....

Ég verð eiginlega að koma þessu gamla bloggi hérna frá mér sem ég held að sé orðið tveggja vikna gamalt, bara svona til að losna við það úr sýsteminu. Af einhverjum mjög svo dularfullum ástæðum vill bloggerinn ekki birta þennan texta hér svo ég set hann í comments...Wúalla:

Jæja loksins virkaði þetta drasl! Nú dettur mér bara ekkert sérstakt í hug að skrifa um hahaha!
Kannski seinna í kvöld, who knows?

ok þetta er síðasta tilraun...ef þetta virkar ekki núna er ég sko bara farin eitthvað annað! Heyrirðu það þarna leiðinda blogger?!!

virkar þetta núna?

Aldeilis kominn tími til að trimma herið. Það eru mörg ár síðan ég fór í klippingu á Íslandi þannig að ég hef ekki hugmynd um hvert ég á að fara? Hjálp vel þegin!

Þessi helgi var alveg einstaklega fljót að líða. Ég bara trúi því ekki að ég sé að fara að vinna á morgun. Jæja, vikan er svosem álíka fljót að líða. Tíminn bara flýgur þegar það er mikið að gera. Stundum finnst mér það gott því ég held að mér myndi bara leiðast ef ég væri ekki svona bissí. Stundum finnst mér eins og tíminn líði allt of hratt og ég sé að missa af tækifærinu til að nota hann í eitthvað miklu mikilvægara sem ég reyndar veit ekki alveg hvað er.

Kallinn fór að spila póker og mér leiðist. Ætla að drekkja mínum sorgum í nammi og kók og horfa á eitthvað krapp í sjónvarpinu og bölva því að það sé aldrei neitt í kassanum býst ég við....
Það er alveg voðalegt hvað ég eyði miklum tíma í innantómt og leiðinlegt gláp. Það breytist vonandi næstu tvo vetur amk ef planið mitt gengur upp.

Í framhaldi af grein Egils: (og bloggi Sigurlaugar)

Já mikið er ég sammála. En ég kalla eftir lausnum. Hvernig er hægt að snúa þessu við? Hvernig er hægt að fá fólk til að vinna minna og sinna fjölskyldunni meira? Kannski hækka skatta á yfirvinnuna þannig að það verði óaðlaðandi að vinna svona mikið? Heilaþvottur? Hvernig er hægt að fá fólk til að bera ábyrgð í þessu samfélagi þegar ekki einu sinni stjórnmálamenn gera það? Hvað er það sem getur fengið fólk til að vakna og horfast í augu við vandann og taka ábyrgð og breyta hegðun sinni þannig að það leggi sitt af mörkum? Ég held að við vitum öll af þessum vanda og hálfpartinn bíðum eftir að einhver segi okkur hvað við eigum að gera. Eða er kannski enginn vilji til staðar? Er neysluhyggjan svona mikil að hún blindar okkur þannig að við sjáum ekki eða viljum ekki sjá kaldann raunveruleikann, -einmana börn.

Ég veit það ekki. Persónulega hefur það alltaf verið mottó hjá mér að vinna ekki meira en 100% vinnu og ekki um kvöld og helgar, með nokkrum undantekningum þó. Sumir myndu kalla það leti en mér finnst það meira skynsemi. Mér finnst bara alveg nóg að við fjölskyldan séum öll á sitthvorum staðnum 8 tíma á dag, 5 daga vikunnar.

Það er víst ekki hægt að fá allt. Ég vildi setja Haloscan aftur inn og þá tapaði ég hinum kommentunum æ ooo. Svo var ég að bæta Jonna púka í hópinn og banna honum hér með að hætta! Líka er komin aftur hún Dóra sem átti að vera komin fyrir löngu. Nú svo hef ég tekið upp þá nýbreytni að bjóða upp á hlekki í stafrófsröð. Verði ykkur að góðu!

P.S. svo lýsi ég eftir Hjalta og Lindu:
Hjalti Már og Linda Ósk,
Hjalti Már og Linda Ósk...þið eruð vinsamlegast beðin um að blogga.
(lesist í tilkynningastíl Gufunnar og/eða kallkerfisstíl Hagkaups)

Jæja, þá er þetta árlega átak að hefjast og í þetta skiptið eins og öll hin er þetta ekki bara átak heldur lífstílsbreyting til frambúðar. Hahahah ef það væri rétt þyrfti ég ekki á átaki að halda eller hvad? En að gefast upp er það sama og að tapa og ég ætla sko ekki að tapa í baráttunni við sykurinn, fituna og hreyfingaleysið. Ó nei! Svei! Over my dead body! En best að vera ekki með allt of miklar yfirlýsingar. Ekki bara segja heldur gera! Ég hlakka til...

æ mér leiðist svo mikið. Það gat ekki verið nema ég veiktist eins og allir hinir.

Hvernig á maður aftur að gera likana þannig að þeir birtist í nýjum glugga?

Ahhh...þetta er allt annað líf. Ég var komin með gjörsamlegt ógeð á þessu brúna lúkki. Kúl hvað það er lítið mál núna að gera þetta í bloggernum. Hann er aftur orðinn vinur minn.

Að lokum vil ég hvetja landsmenn nær og fjær til að DRULLAST TIL AÐ GEFA STEFNULJÓS OG HÆTTA AÐ TALA Í SÍMANN Á MEÐAN ÞIÐ KEYRIÐ!!!
Þetta eru svo einfaldir hlutir sem eru svo mikilvægir. Er það virkilega þess virði að hætta limum og lífi til að getað talað í símann undir stýri. Held ekki. Ef síminn hringir á meðan þú ert að keyra, láttu hann þá bara hringja. Gsm símar eru þeirri tækni gæddir að hægt er að sjá hver hringdi og eftir nokkrar mínútur er hægt að hringja í viðkomandi til baka. Ótrúlegt en satt! Og ef helv...síminn er svona gjörsamlega ómissandi akkúrat þegar þú ert að keyra á milli staða þá er til dálítið sem heitir handfrjáls búnaður!
Og þetta með stefnuljósið...what is the fucking problem? Er þetta virkilega svona flókin aðgerð að fólki er fyrirmunað að framkvæma hana. Ég skil þetta bara ekki. Það er ekki einu sinni hægt að kenna leti um því þetta snýst um að hreyfa á sér puttann...andskotinn hafi það. Umferðin gengi svo miklu greiðar ef fólk drullaðist til að gefa stefnuljós.
Já ég er bara hundpirruð á þessum smákóngum í umferðinni hérna á Íslandi. Þeir minna mig reyndar dálítið á danska hjólreiðamenn í mentalitet...Farið frá, ég á veginn og ég ætla að komast áfram!

veiiii...ég er loksins búin að eignast þvottavél og get hætt að fara alltaf í vesturbæinn til mömmu að þvo eina og eina vél!

Jæja, ég ákvað að stelast til að blogga aðeins í vinnunni. En ég hef eiginlega bara ekkert að segja, fannst ég bara þurfa að setja eitthvað á síðuna. Allt er við það sama, vinna, sofa éta eiginlega. Maður er farinn að hlakka til sumarsins en best að hlakka kannski fyrst til páskanna. Já Kaffi París er ekki góður staður til að hittast og ræða málin...frekar hrópa málin og æfa sig í að panta á ensku.

OK...stelpur ég veit! Hvernig líst ykkur á DK-saumaklúbb? Þið vitið, þær sem eru fluttar heim? Mig langar það...hverjar eru með?

Stundum er ég alveg ofsalega einmana...í dag var þannig dagur. Þetta lagast vonandi með hækkandi sól. Mér finnst bara einhvernvegin allir vera í vinnunni, í bílnum sínum eða að sinna fjölskyldunni. Ekki að það sé eitthvað að því...það virðist bara fátt annað komast að. Ég veit ekki alveg hvort ég sé að fíla það. Kannski er ég bara svona djöfulli leiðinleg ;) Þetta er ferlega erfið aðlögun og ég þarf að hafa mig alla við til að detta ekki í svartan pitt. Hann er samt orðin dökkgrár.

jæja, ætli ég geti bloggað núna...smá test

æm bakk